Dewch at Eich Gilydd Bwyd am Oes
Wedi’i lansio yn 2019, roedd Dewch at Eich Gilydd yn rhaglen pedair blynedd gan Gronfa Gymunedol y Loteri Genedlaethol a arweiniwyd gan dîm Bwyd am Oes Cymdeithas y Pridd. Roedd ganddi bum partner cenedlaethol a 12 partner lleol ledled y DU. Y nod oedd dod â phobl o bob cenhedlaeth a chefndir at ei gilydd drwy dyfu, coginio, a rhannu bwyd da. Pan newidiodd y pandemig ein bywydau, roedd yn rhaid i'r rhaglen addasu i ffordd newydd o weithio. Arweiniodd hyn at gyfoeth o sesiynau ar-lein, rhwydweithio a chysylltu pobl ledled y DU drwy eu cariad tuag at dyfu a choginio bwyd.
Rydym yn dal i wynebu llawer o heriau bob dydd ac mae arweinwyr cymunedol yn aml ar flaen y gad o ran cefnogi’r rhai sydd angen cymorth fwyaf, ac roedd y rhaglen Dewch at eich Gilydd yno i’w cefnogi.
O feithrin hyrwyddwyr bwyd da cymunedol ar lawr gwlad drwy ein rhaglen arweinyddiaeth Fy Nghymuned Fwyd, i rannu sgiliau gyda’r sefydliadau Partner Lleol, ein cenhadaeth ar y cyd a’n cydweithrediad agos â’r Partneriaid Cenedlaethol, mae’r gwersi a’r wybodaeth a gafwyd drwy gydol y rhaglen wedi bod yn amhrisiadwy.
Fy Nghymuned Fwyd
Rhaglen arweinyddiaeth garlam i drefnwyr cymunedol yw Fy Nghymuned Fwyd a lansiwyd gan y rhaglen Dewch at Eich Gilydd ym mis Medi 2021. Hyd yma, bu dwy garfan o'r rhaglen Fy Nghymuned Fwyd, sef 2021 a 2022, lle y cafodd 114 o Arweinwyr Bwyd Da y dyfodol eu recriwtio a’u hyfforddi o bob rhan o’r DU. Mae’r rhaglen wedi darparu 138 awr o hyfforddiant i gyd ac wedi dyfarnu mwy na £50,000 mewn Grantiau Gweithredu Arweinyddiaeth ar gyfer atebion arloesol i faterion bwyd lleol.
Disgwylir i Fy Nghymuned Fwyd gynnal trydedd carfan yn hydref 2023, wrth i’r rhaglen arweinyddiaeth ddatblygu y tu hwnt i Dewch at Eich Gilydd i ddod yn rhan o uchelgeisiau Cymdeithas y Pridd i ddatblygu Llysgenhadon Bwyd Da Drwy rymuso a chefnogaeth.
Rhwydweithiau
Drwy gydol y rhaglen Dewch at Eich Gilydd daeth rhwydwaith cyfoethog ac amrywiol o filoedd o unigolion, cymunedau, grwpiau'r trydydd sector, mentrau cymdeithasol, awdurdodau lleol a gweithwyr eraill y llywodraeth ynghyd i lunio gweledigaeth eang o dyfu, coginio a rhannu bwyd da.
Gan adeiladu ar hyn, lansiodd y rhaglen Dewch at Eich Gilydd gyfres genedlaethol o Ddigwyddiadau Rhwydwaith. Eu nod oedd archwilio'r defnydd o bŵer rhwydweithiau i hyrwyddo dinasyddiaeth fwyd dda ar lefel gymunedol, yn ogystal â hwyluso mwy o gysylltiadau rhwng cymheiriaid yn lleol ac yn genedlaethol.
Mae gwybodaeth am ddigwyddiadau Rhwydwaith sydd i ddod ar gael yma
Ymgyrchoedd – Plannu a Rhannu / Coginio a Rhannu
Gyda nod gyffredinol o uno pobl o wahanol gefndiroedd, oedrannau a demograffeg drwy ddod at ei gilydd i goginio a thyfu bwyd da, roedd yr ymgyrchoedd Plannu a Rhannu a Coginio a Rhannu ill dwy yn arfau perffaith ar gyfer ysgogi a chysylltu torfol mewn perthynas â gweithgareddau sy'n seiliedig ar fwyd.
Bydd yr ymgyrchoedd Coginio a Rhannu a Plannu a Rhannu yn parhau y tu hwnt i'r rhaglen Dewch at Eich Gilydd.
Gwerthusiad ac Effeithiau'r Rhaglen
Er y bydd llawer o’r gweithgareddau drwy’r rhaglen Dewch at Eich Gilydd yn parhau y tu hwnt i’r cyfnod cychwynnol o bedair blynedd, megis rhaglen arweinwyr Fy Nghymuned Fwyd, digwyddiadau rhwydwaith, a’r Ymgyrchoedd Plannu a Rhannu a Coginio a Rhannu, cafodd pedair blynedd y rhaglen eu gwerthuso'n fanwl a gwnaed gwaith ymchwil arni gan bartneriaid academaidd, sef Prifysgol Gorllewin Lloegr a Phrifysgol Cofentri. Mae’r holl adroddiadau cyhoeddedig i’w gweld yma sy’n cynnwys Adroddiad cryno diwedd y rhaglen a chanfyddiadau academaidd mwy manwl ynghylch Fy Nghymuned Fwyd, rhwydweithiau a phartneriaethau a’r ymgyrchoedd.
Cadw Cysylltiad
Fel gyda phob cymuned a rhwydwaith da, nid yw'r sgwrs byth yn dod i ben! I gael y newyddion diweddaraf am yr ymgyrchoedd, Fy Nghymuned Fwyd a digwyddiadau rhwydwaith, gallwch ymuno yn y sgwrs ar y sianeli hyn: