Trefnodd Ann Ward, Swyddog Ymgysylltu Rhanbarthol Dewch at eich Gilydd Bwyd am Oes yng Ngogledd Iwerddon, Ginio Mawr (Rhithwir) ar gyfer y tîm.   

Roedd yn hyfryd lansio dathliadau’r Cinio Mawr (Rhithwir) ddydd Gwener gyda chydweithwyr o’r tîm Dewch at eich Gilydd Bwyd am Oes.  

Gan ein bod ni i gyd wedi bod yn cwrdd o bell ers dechrau’r cyfnod clo, roedd yn gyfle gwych i rannu bwyd a chysylltu ag aelodau eraill y tîm yn y ffordd hon. Fe wnaethom rannu storïau dros ginio ac atgofion am fwyd da. 

Ein synhwyrau, yn enwedig ein synnwyr arogli, yw ein prif ffordd o hel atgofion am ein profiadau o fwyd. Roedd yn hyfryd iawn rhannu storïau am atgofion o fwyd o’n plentyndod a’r cysylltiad â natur drwy fwyd.  

Llysiau rhost blasus a grëwyd gan Dianne, Rheolwr Rhaglen Dewch at eich Gilydd Bwyd am Oes Gogledd Iwerddon. 

I ginio, cefais fara soda gydag olewydd tsili, tomatos, brenhinllys a chaws Cheddar wedi’i doddi gyda salad o’r ardd, brenhinllys, mibwna a miswna (dail salad sbeislyd hyfryd o Japan), berwr dŵr, sbigoglys, suran Ffrengig, cennin syfi a berwr y gerddi gyda siytni planhigyn wy a leim, a betys a marchruddygl a wnaed gan fy ffrind Iain.  

Mae fy ngardd yn wledd i’r synhwyrau ar hyn o bryd - mae’n gyffrous bod fy mefus ar fin aeddfedu. Ers i mi ymuno â’r tîm ym mis Ionawr, rwyf wedi cael fy ysbrydoli i dyfu mwy o fy mwyd fy hun ac rwyf wedi cael rhywun i osod gwelyau wedi’u codi. 

Rwy’n mwynhau nifer o sesiynau cyfnewid planhigion gyda chymdogion a ffrindiau, sydd i gyd yn ychwanegu at y profiad o faethu. Rwyf hefyd wedi gwneud fy ngwrtaith hylif fy hunan gyda dalan poethion a llysiau’r cwlwm o fy ngardd.  

Ydych chi wedi cael eich ysbrydoli? Cymerwch ran mewn gweithgaredd Dewch at eich Gilydd!